ឥទ្ធិពលខ្យល់មាត់ពីរឃ្លា
(បទភុជង្គលីលា) ប្រស្នា
១. ឥទ្ធិពលខ្យល់មាត់ពីរឃ្លា អ្នកផងរាល់គ្នា គ្រប់គ្រាញាប់ញ័រ។
២. មិនថាក្មេងចាស់តែស្គាល់ ឮហើយប៉ះពាល់ ដោយផ្ទាល់អារម្មណ៍។
៣. ខ្លះសុខខ្លះសោកលាយឡំ ហាក់ត្រូវសណ្តំ បង្ខំស្វែងរក។
៤. មនុស្សភាគច្រើនគរគោក លើសាកលលោក ប្រឹងយកមកគិត។
៥. ទំាងឮពិតដូចមិនពិត សោកសប្បាយចិត្ត ព្រោះត្បិតខ្យល់មាត់។
៦. វិលវល់នៅក្នុងវាលវដ្ត ខ្លះត្រូវខ្លះភ្លាត់ យ៉ាប់ឃាត់ចិត្តបាន។
៧. អ្នកខ្លះរស់ដោយសុខសាន្ត ខ្លះរស់យ៉ាប់ប្រាណ រំខានព្រោះវា។
៨. តើអ្វីខ្យល់មាត់ពីរឃ្លា នាំសោកវេទនា ជួនគ្រាសប្បាយ។
៩. អ្នកខ្លះមិនស្អប់មិនណាយ មិនប្រឹងខំស្រាយ ឲ្យកាយវង្វេង។
១០. វិលវល់ដូចឆ្កួតតាមភ្លេង មិនថាចាស់ក្មេង ឃ្លោងឃ្លេងដួងចិត្ត។
១១. វាផ្តើមពាក្យផ្ទុយខ្មៅពិត រឈរមុខស្និទ្ធ ស្នើគិតបាត់ជើង។
១២. ទួញសោកទ្រូងដូចឆេះភ្លើង រមួយទើងមើង ខ្ពើមជើងឈរមុខ។
១៣. ស្នើបាត់ជើងនផុតទុក្ខ បានរពាំងមុខ ចាត់ទុកជាគ្នា។
១៤. ត្រូវផ្សំរូបបញ្ចូលគ្នា ទើបអាចយល់ឃ្លា តើវាពាក្យអ្វី?
១៥. ទាំងរូបមុនក្រោយចាស់ថ្មី កត់គិតឃ្មាតខ្មី យល់ន័យជាក់ច្បាស់។
១៦. ខ្យល់មាត់មួយនេះខ្លាំងណាស់ ទុក្ខសោកស្រឡះ ប្តូរផ្លាស់សប្បាយ។
១៧. អ្នកខ្លះអាចភ្លេចស៊ីបាយ តែពេលឃ្លាតឆ្ងាយ ចិត្តស្តាយទន្ទិញ។
១៨. ឯខ្យល់មាត់មួយនោះវិញ កើតសោកទុក្ខម្មេញ យ៉ាប់ទិញក្តីសុខ។
១៩. ចិត្តកាយហាក់ប្រែចាប់ចុក ឮមិនស្រណុក សំកុកតូចចិត្ត។
២០. ព្រោះត្រូវខ្យល់មាត់រួមរឹត នាំឲ្យយើងគិត ជាក់ពិតខ្វល់ខ្វាយ។
២១. ខ្យល់នោះពាក្យអ្វីសូមស្រាយ ចោទមិនវែងឆ្ងាយ គ្រប់កាយតែងឮ។
២២. អ្នកខ្លះបានស្តាប់អាចឈឺ ពាក្យនោះហាក់ឌឺ ច្រើនព្រឺគ្រប់គ្នា។
២៣.មិនចង់ឮឡើយគ្រប់គ្រា ដូចពាក្យនិន្រ្ទា តែវាបាត់រ។
២៤. ហាក់យំក្តែងៗស្រែកថ្ងូរ ព្រោះបាត់ជើងរ ផ្លាស់ប្តូរសម្រស់។
២៥. អ្នកផងតែងជេរស្តីស្តោះ មិនសមឡើយសោះ ឃ្លាតអស់ន័យដើម។
២៦. ខ្យល់មាត់ពីរនេះវាផ្តើម ជួនសុខទុក្ខកើន ចំរើនព្រោះវា។
២៧. បើចង់សិរីហូរហៀរ ត្រូវប្រឹងការពារ ពីរឃ្លាឲ្យបាន។
២៨. កុំឲ្យខ្យល់នេះរំខាន យកឈ្នះឲ្យបាន ចិត្តប្រាណអាត្មា។
២៩. ខ្យល់មាត់ពីរនេះបញ្ហា វក់គិតពេលណា សុខាឃ្លាតឆ្ងាយ។
៣០. ដូចនេះប្រុសស្រីគួរណាយ អប់រំចិត្តកាយ កុំស្តាយខ្យល់មាត់។
៣១.លោកនេះគ្មានអ្វីទៀងទាត់ សុខទុក្ខគង់ព្រាត់ ចង់ឃាត់មិនបាន។
៣២.បើយកគិតពិតរំខាន រវល់ឥតស្រាន្ត ចិត្តប្រាណមិនស្ងប់។
៣៣.មនុស្សខ្លះអាចប្រែឡប់ ព្រោះគិតមិនស្អប់ ប្រឹងខ្ចប់ស្រលាញ់។
៣៤. ខ្យល់មាត់នោះវាត្របាញ់ សម្លុតឲ្យចាញ់ តាមផ្ចាញ់ចិត្តមនុស្ស។
៣៥. បើចង់សុខត្រូវប្រឹងជុះ យកឈ្នះខ្យល់នោះ ជម្រុសកុំគិត។
៣៦.កាន់ធម៌ខន្តីប្រព្រឹត្ត មិនញាប់ញ័រចិត្ត ជីវិតមង្គល។
លីម ចំរើន ២៧.០៩.២០១២
កវី ខេត្តស្ទឹងត្រែង 