ខ្ញុំខឹងកូន

(បទ ក្របចក្រវាឡមេ១២ថ្មី)
១. ខ្ញុំខឹងកូន សូន្យគំនិត គិតតែវ៉ៃ ដៃខ្ញុំទះ ជើងទាត់លះ ព្រះប្រែមារ ជាបិសាច កាចឃោរឃៅ
គ្មានអាណិត ចិត្តអាសូរ ប្តូរចរិត ពិតជាឪ ភ្លេចខុសត្រូវ ទៅដូចឡប់ ខ្ចប់គុណធម៌ ញ័រទ្រូងក្តៅ។
២. រៀនច្រើនឆ្កួត អួតឯងគ្រាន់ ជាន់ដានចាស់ ច្បាស់ក្រឡែត ខឹងអត់ហេតុ ប្រេតក្នុងចិត្ត ស្អិតទោសៈ ដាក់កូនចៅ
ការតាំងចិត្ត ពិតពីមុន ធ្ងន់ប្រែស្រាល ដាលប្រែខ្លៅ ចិត្តសោកសៅ ក្តៅគ្រាំគ្រា ជាកំណើត កើតទុក្ខឲ្យ។
៣. បើមិនវ៉ៃ ក្រៃខ្លាចកូន សូន្យមារយាទ ឃ្លាតខុសផ្លូវ ខឹងវ៉ៃទៅ ត្រូវដូចខុស ដុះព្រួយចិត្ត ពិតស្តាយក្រោយ
កូនឈឺកាយ ស្តាយក្នុងចិត្ត គិតទង្វើ ធ្វើជ្រុលហើយ ម្ចាស់ថ្លៃអ្ហើយ ឲ្យខ្ញុំគិត ស្និទ្ធផ្លូវណា ថាផុតទុក្ខ។
៤. រឿងពិតខ្ញុំ ធំជាគ្រោះ ព្រោះតែខឹង រឹងមិនទប់ ខឹងឆ្កួតងប់ លុបគុណធម៌ ស្គាល់ខ្មៅស ក្រពុលមុខ
សូមកុំត្រាប់ ច្បាប់ខ្ញុំហាម តាមមិនល្អ កកើតទុក្ខ ដូចជាប់គុក ពុកត្រូវគិត ចិត្តមេត្តា អាសូរកូន។

-រឿងពិតខ្ញុំវ៉ៃកូនប្រុសរបស់ខ្ញុំឈ្មោះ លីម ឧត្តមមុនី កាលថ្ងៃព្រហស្បតិ៍ ទី ២៧ ខែមីនា ឆ្នាំ ២០១៤

លីម ចំរើន ២៨.០៣.២០១៤